L’ancunteda co-partezipativa danter Museum,Union di Ladins y espunënc dl mond culturel ie unida dassënn prijeda. Tema fova la mostra dla chiena y ndiretamënter nce l daunì dla Cësa di Ladins. L fova n’ucajion per audì n iede plu minonghes, da pert de jënt neutrela, ma a chëla che ti sta a cuer la cossa ladina, zënza fé politica o juesc de pudëi. N à nsci pudù audì ideies che stizova sun esperienzes prufesciuneles, prupostes de n niveau aut, minonghes persuneles y dantaldut cunscidrazions che jive ite sun la “cossa”.
“Desmincë l passà, cialan inant, y vester boni de jì ite duc adum te n compromiss per l bën dla cultura ladina.” Chësc pudëssa vester l riassunt, te na frasa, de na discuscion longia, ma scialdi nteressanta. Tosc meterons on-line l protocol ufiziel dla sëira. De gra a duc chëi che ie unic!
Fotos: Usc di Ladins
