Dut l instà iel unì laurà per fé da nuef l egaduz de Sacun. A mez setëmber unirà la streda danter Pedracia y l Jakoberhof inò giaveda su per mëter ju la roles per la lumes de streda y l internet asvelt.
L proiet per fé da nuef l egaduz de Sacun ie bele muet dan n valgun ani, canche n fova ruvei sëura che l egaduz fova scialdi melciafià y che l fova de bujën de l cumedé su. L egaduz de Sacun fova plu da giut di privac. La jënt da Sacun à for dassënn cialà sun si funtanes y eghes y à for fat n lëur scialdi bon, ma sambën che ngali fovel ruvà ti ani. Davia che nce la regules vën for plu sciorfes, ova i privac dan feter vint ani tëut la dezijion de ti sëurandé l egaduz al Chemun de Urtijëi.
L egauz de Sacun fova cun i ani scialdi melciafià, dantaldut ajache l’ega ova puech druch y l nen univa puecia: nia ajache la funtanes ne jeta nia truepa ega, ma ajache l resservar fova massa pitl y la roles stravova. Canche l Chemun ie ruvà sëura che l fova gran ëura de fé velch, se an sentà pra na mëisa deberieda cun l vardian dal’ega dl Chemun de Urtijëi Christian Stuffer y n à pensà do coche n pudëssa fé.
L proiet per l egaduz nuef
N à nsci nciarià n architet de fé n proiet per fé dut nuef. L à pona durà bëndebò giut nchin che n à muserà y studià do dut. Canche l dessëni fova a n bon pont, an pona messù l mandé a Bulsan a l lascé cialé do da na cumiscion. Iló al tacà bëndebò giut, belau n ann ala durà nchin che l Che- mun à giapà dut l bënsté cun n valguna mudazions. L fova de plu robes che l Chemun à mo messù fé o messù tò demez, nchin che ngali iesen ruvei a n bon pont y n à nsci pudù dé pro l proiet y da dedò l scrì ora.
I lëures chëst ann d’ansciuda
Chëst ann d’ansciuda à l Chemun pudù scumencé cun i lëures per chësc proiet scialdi mpurtant che porta sambën legrëza a chëi da Sacun, ma che à nce purtà n gran sotsëura tl luech. L ie mé una na streda per jì sa Sacun y chëla an messù giavé su y śaré per pudëi mëter ju la roles dal’ega nueves. Per nfurmé i zitadins a puntin n cont di lëures y dla situazion, an l ann passà d’autonn fat na ancunteda su da Odl cun duc i zitadins de Sacun. Truepa jënt ie unida al’ancunteda y l Chemun ti à spiegà n pue’ plu avisa l program di lëures.
Do Pasca via, de chëst ann, iesen stac boni de scumencé cun i lëures. De juni iel unì metù ju la rola dal’ega da bever nueva dal luech Jakoberhof nchin sa Pedracia, ulache l fova bele n pitl tòch de rola nueva che n ova fat dan n valgun ani. La firma Hofer, che ie unida nciarieda cun i lëures, à laurà drët bën y perchël iela jita do la rata drët aslune. Sambën che la streda fova for stlu- ta ntan l di y che chëi che stajova da iló su messova unì ju a pe nchin dal hotel da Sacun, ulache i pudova lascé l auto.
La roles ju pra l resservar nuef che vën fat dlongia Peza.
N ie stac boni de mëter ju la roles nueves mo de lugio. Dan la feries di 15 de agost an pona mo fat su n gran resservar dal’ega nuef, dlongia Peza. Ntan la festes al pona pudù suië y da dedò l an curì ite a na maniera che n ne l uderà nia plu.
De lugio an nce pià su da nuef l’ega dla doi funtanes sa Sacun, sambën cun n geologh che ti ie for stat do, acioche l lëur vënie fat sciche l toca. N ie jic plu sot a pië su l’ega per la fé pona jì ite te n mënder resservar dlongia la funtanes. Da iló pëia pona l’ega ju per la roles y va ite tl gran resservar nuef da Peza. L’ega dla funtanes sota l Lech da Lagustel ie, aldò dla analises che n à fat, drët na bona ega. L ie perchël bel che chëi da Sacun posse se nuzé inant dl’ega che i à for abù y che i à for tan stimà.
Idranc nueves
Sa Sacun iel nce unì metù su n valgun idranc nueves. La mancianza de idranc fova nchina śën scialdi n gran problem sa Sacun. Sce l fossa stat n meldefuech, fossel stat da stramp rie per i destudafuech destudé l fuech, davia che l ne fossa nia stat ega assé. N ëssa messù tré de gran slauhs dal Jakoberhof su, ajache l’ega de Cunfin ruvova mé nchina iló. Nscila iel unì metù su n valgun idranc nueves che unirà metui n droa cun dut l egaduz nuef d’autonn, a na maniera che l sibe ega assé per pudëi destudé n fuech, sce l ëssa propi da vester zeche.
Coche la va inant
Da mez setëmber inant geven inò su la streda tl luech de Sacun, davia che l vën metù ju la roles per la lumes de streda y la roles per l internet aslune. Plu avisa vëniel giavà su l tòch de streda danter Pedracia nchin ju jal Jakoberhof. Chësta roles ne vën nia metudes ju tan sot coche l’ega, perchël jirala chëst iede inant plu aslune. La roles vën sambën nce metudes ju tla doi mëndra stredes ntëur ora, chëla che va su nchin ta Prëubl y chëla che va via de viers de Festil. N spera de pudëi finé via i lëures y avëi tacà ite dut da nuef nchin a mez utober.
La streda unirà curida ju cun n pue’ de asfalt per la lascé pona arsì via per l inviern. D’ansciuda meteran pona ju n bel asfalt nuef y n cumederà su la streda a maniera che la sibe anjenieda ca a puntin. L custimënt de duc chisc lëures ie de feter 1,2 milions de euro.
Lauré cun l’eghes ie for scialdi zite, ma dut adum ala nchina śën scialdi butà y l ie dessegur unì fat n bon lëur. N spera che la vede inant nscila y che n posse stlù ju i lëures al plu prësc che la va.