Nce d’inviern puderan se nuzé dla luegia nueva da dé sëura cun i joleri tl pra da Petlin a Urtijëi: i lauranc de Chemun se cruzierà de palé ora la rampa y la plaza acioche la ambulanzes posse furné permez.
Chëst ann iel unì miurà la luegia nueva da dé sëura cun l joler de prim aiut tl pra da Petlin. L fova de bujën de na tel lerch plu daujin al zënter de Urtijëi, a na maniera che l dutor ruve plu debota pra chëi che à de bujën de aiut. Pra la luegia da dé sëura tl pra da Petlin ne se tratel nia de na plaza cun n peton y duta la nfrastrutures, -davia che te chël cajo fossel dut stat plu cumplicà y n ëssa messù tenì ite truepa regules per la manutenzion ‑ ma de na spersa de pra che vën mé nuzeda datrai y canche l ie propi de bujën.Cie che fova mpurtant, fova chël de anje‑ nië ca na rampa nia massa ërta cun na streda de peton, a na maniera che l’ambu‑ lanza posse furné via daujin al joler per purtè permez plu saurì y te maniera plu segura i pazienc. Y chël nce d’inviern, zënza messëi mëter su la ciadëines, coche nes à spiegà l respunsabl dla Crëusc Blancia de Gherdëina. L ie unì defati fat ora cun l Chemun de Urtijëi, che i lauranc de Chemun palerà ora la rampa y la plaza per l joler canche l nëiv. Tl rundel iel nce unì metù su n sëniavënt, a na maniera che l pilot dl joler posse udëi de ciun viers che l vënta canche l ie da dé sëura tl pra. Nchinamò ne ie la luegia mo nia unida adurveda, davia che la muessa mo crëscer ite y nsci se nuzeran per ntant dla luegia da dé sëura ta Mulin da Coi.L Chemun tol l'ucajion per ti sentì gra ai patrons dl grunt per avëi dat pro de lascé dé sëura l joler.