Tobia Moroder - N ambolt nuef per ti dé na bela sburdla a Urtijëi!
L duvier de na politica moderna ie do mi ntënder chëla de abiné soluzions criatives y inuvatives ai problemes dla sozietà y de mëter al zënter la persona, cun si bujëns y si ejigënzes, a na maniera che uniun se n stebe bën te si ncësa. Chël sarà puscibl lauran sun chemun duc deberieda, cun dinamism, mutivazion, fundamënt y prufesciunalità.
Cun nosta idea de na politica de chemun nia lieda ai partic y che mët al zënter la persona ons rati sapù da liejer l spirit dl tëmp. L basta ti cialé ai problemes che ie n pue’ ti autri chemuns per capì che l sistem da śën ne n’ie nia plu atuel. La jënt n’à do nosta minonga assé dla maniera de lauré di partic, y la partezipazion for mëndra ala veles ie n sëni tler n chësc cont.
Nëus ti dajeron perchël n gran valor nia mé al „cie“, ma ënghe al „co“. Ulon purté sun chemun na cualità de discuscion nueva, na maniera nueva de ti jì permez ala cosses. Mpurtant saral per nëus ënghe rujené y scuté su la jënt, ajache ala fin di conc ie i bujëns di zitadins nosc program. A chisc bujëns cialerons de ti dé respostes cuncretes, acioche l luech posse se svilupé positivamënter de viers dl daunì.
Nëus saron inant „Per la Lista Unica“ y chësc fin purverons a arjonjer nce do la veles, trajan ite duta la forzes politiches tla dezijions. Duc chëi che à giapà la crëta di litadëures y che uel lauré costrutivamënter per l bën de Urtijëi, dëssa pudëi l fé.
La stima a mi sciche candidat ambolt fossa do mi minonga n „sci“ a na politica plu persunela y n sëni de crëta de viers de 27 de bon candidac, cun cumpetënzes ti ciamps plu desfrënc, che à na gran ueia de mëter a despusizion si cumpetënzes, si savëi, si ideies y si idealism per l luech y la cumenanza.
N’ucajion Unica per mudé vënt!
dut. Tobia Moroder