Ludwig Moroder
72 ani, biologh n pension
Son Ludwig Moroder, 72 ani, biologh n pension. Son chersciù su a Urtijëi ulache son jit a scola nchina tla mesana. Do avëi fat l lizeum scientifich a Bulsan ei arjont la laurea de biologia tl’Università de Bologna. Do la laurea ei nsenià per plu ani materies scientifiches tla scoles autes de Gherdëina.
Mi pascion fova bele for de lauré te n labor y nscila ei pudù pië do na stiera aldò metan su la microbiologia dl’eghes y dla maiadives pra l Labor Biologich de Leifers.
Tres mi lëur de microbiologh ei cialà do la cualità dl'eghes de duta la provinzia y ei udù tan mpurtant che l ie stravardé l ambient ntëur ala funtanes y ti sté do ala strutures dl egaduz che mëina l’ega nchin pra spina. Ti ultimi ani de lëur ei pona purtà inant mi atività tl Labor de Microbiologia y Virologia dl spedel de Bulsan, me dajan ju cun infezions y malaties gaujedes da virus, bateries, fonc y parassic. Sciche respunsabl de cualità ei purtà l Labor ala Certificazion ISO 9001 y cuntribuì al acreditamënt di labors di spediei dla provinzia aldò ala Norma ISO 15189. Chësta sperienza me à cunsentì de mantenì inant mi atività sciche ispetëur per l acreditamënt di labors tla sanità tla Talia.
La tematiches ntëur a nosc Chemun me à for nteressà, ma da canche son n pension ei plu tëmp y ueia de ti sté do, dajan mi cuntribut y pitan mi cumpetënzes per ti jì permez ai problems dantaldut ti ciamps dla cultura, dla sanità y dl ambient, pensan al bon viver y al daunì de nosta jënt. Me sta a cuer na aministrazion de chemun trasparënta che, do avëi tëut ite plu ideies y minonghes, tol na dezijion tlera tl nteres dla cumenanza, savan che l ne da suvënz nia soluzions scëmples. L ie dantaldut la maniera de se cunfrunté y de se rujené ora ntëur a la Lista Unica che me dà la forza y la ueia de fé pea.