Monika Kelder
62 ani, cunlauradëura dl Museum Gherdëina
Ie tënie dassënn a nosta cultura y l me stà a cuer la persones de nosc luech, che dëssa se sentì reprejentedes, cunscidredes y respetedes te si bujëns. L ie nce drët che la persones che uel unì a viver tlo da nëus ebe i medemi dërc y posse se ntegré te nosta cumenanza. Ie me candideie per sustenì nosc ambolt Tobia Moroder, che se à purvà dassënn ti ultims 10 ani de ruvé pra na Cësa di Ladins nueva y sambën nce a n Museum nuef. Me mbince che l posse purté a bon fin chësc pruiet ti proscims ani. La Cësa di Ladins merita na sënta dënia dla lies che fej pert, la Union di Ladins cun si Biblioteca Ladina, l Museum de Gherdëina cun si arpejon storica y culturela unica, la lia dl teater, la Union Generela di Ladins dla Dolomites, che ie la lia tët de duta la Unions dla Ladinia y la redazion dla zaita “Usc di Ladins”. La Cësa di Ladins ie NOSTA cësa de cultura y n patrimone de nëus duc, tenion adum acioche la vënie a se l dé! Ue me mpenië acioche la Cësa di Ladins devënte nce n pont de ancunteda dla persones che vën da d’autra cultures y identiteies, che les ebe tlo la puscibltà de mparé a cunëscer nosta realtà y se viver ite te nosc luech. La lies à de bujën de ulenters - sibe nosta jënt coche nce chëi che vën da oradecà à truep talënc ascundui, deberieda pudons valorisé l gran potenzial che ie te uniun y se l nuzé a bën de duta la cumenanza.