A metà de setëmber iel stat la prima ancunteda dla grupa de lëur che ie unida metuda su per lauré ora l program de svilup cumenel.
La lege provinziela “Teritore y cuntreda” vëija dant che uni chemun dëssa lauré ora n prugram de svilup cumenel. L se trata de capì de cie viers che l chemun uel jì per arjonjer na bona cualità de vita per duc i zitadins, tulan ite duc i ciamps mpurtanc per la vita dla persones: avëi na cësa o n cuatier ulache n possa sté, giapé da lëur, pudëi jì a scola, nascer, crëscer y deventé vedli, se muever, pudëi viver y stravardé la natura y la cuntreda. Nce i zitadins dëssa fé pea, perchël iel nce bele unì metù a jì na nrescida da pert dl Chemun de Urtijëi, ulache duc à pudù fé pea y dì la sia sun cie che i se mbincia per l daunì de Urtijëi.
Chi che fej pert dla grupa de lëur
Coche segondo var iel ai 13 de setëmber unì fat la prima ancunteda dla grupa de lëur che rujenerà pea n cont de coche dëssa cialé ora l Chemun de Urtijëi tl daunì. Plu avisa à l Chemun nciarià cin esperc de ciamps defrënc ‑ urbanistica, ambient, turism, mubiltà y valutazion strategica dl ambient ‑ de lauré ora l prugram de svilup cumenel cun l sustëni dla grupa de lëur. Dla grupa de lëur fej pert l ambolt dl Chemun, n valgun reprejentanc de duc i partic che ie tl Cunsëi y undesc reprejentanc dla lies dl luech: di artejans, dl artejanat artistich, di jëuni, dla prutezion zevila, dla cultura, dl sport, dl ciamp soziel, dla lies per la scunanza dl ambient, di paures y dl turism. Mplu iel mo sies ulenteres che se ova fat inant bele da plu da giut y che à dat si despunibltà de lauré pea pra chësc prugram.
La prima senteda
Ntan la prima senteda iel unì spiegà n pue’ n generel de cie che la se trata y ciuni che ie i fins dl program de svilup cumenel. Daldò à Francesco Sbetti, cumëmber efetif dla grupa de lëur y espert nciarià, prejentà la valutazion strategica dl ambient. L ie unì cris ora chësc coche prim argumënt, davia che sun chësta valutazion se stiza duc i ciamps per chëi che n laurerà ora n program per i proscimi ani.
Coche la jirà inant
D’autonn saral cin ancuntedes dla grupa de lëur, ulache l prim var sarà chël de capì coche l Chemun de Urtijëi ie metù n cont dl’urbanistica, dla cuntreda y dl ambient, dla mubiltà y dl turisms te chësc mumënt, ciuna che ie la situazion atuela. Ala fin dla cin ancuntedes fajeran na manifestazion publica per prejenté i resultac de chësta prima pert dl proiet. La ancuntedà sarà ai 29 de nuvëmber te Cësa de Cultura. Cun l ann nuef, tl scumenciamënt dl 2024, laureran pona inant sun l aspet strategich.
L fin de dut ie chël de capì de cie viers che l ie de bujën de jì tl daunì, chël uel dì coche l Chemun dëssa se svilupé per ti garantì a duc la puscibltà de pudëi viver bën a Urtijëi.