L'aministrazion de chemun se mpënia à tenì al orden y a miuré la strutures y nfrastrutures dl luech.
Chësc ie n lëur nia da sotvaluté sce n pënsa a dut chël che ie de puscion dl chemun de Urtijëi. Danter l auter iel de plu scoles y la scolina, la cësa de chemun y la Cësa de cultura, gran pert dla stredes, la plazes, la cundotes dal'ega, la garage y la plazes dai auti, la plazes da fé damat y la strutures da fé sport; pona mo na gran cumpëida de troies y la iluminazion publica. Savon che te chisc ultim ani iel unì fat truep lëures, nvestian truepa energies y fajan de gran nvestimënc per mantenì, mëter al orden y miuré ulache l fova de bujën.
Nce la Park Urtijëi, sozietà dl Chemun à cialà de dé si cuntribut de chësc vieres. Cun l sustëni finanziel dl Chemun iel unì restru- turà l fabricat dl zënter dal tennis. L ie unit fat da nuef l tët che stravova y sëuraprò dut chël che fova de bujën per mëter n segurëza la strutura. Chësc lascia inò pro de mëter a jì turnoies de tennis, manifestazions cultures y mostres de artejanat. I lëures ie unic finei tl mëns de utober. Nce per chël che reverda la “Garage Central” an dan da puech finà i lëures de spusté su sun la sëida cun la streda Stazion la stangia che ie ala ntreda. Chësta mudazion ti dà a chëi automobilisć che à n abunamënt la puscibltà de pudëi furné ite plu saurì. L fova l problem che canche la garage ne ova plu deguna lerch a despusizion y i auti furnova mpo ju per la rampa, se mpifova la ntreda y chëi che ova n abunamënt ne pudova per chësta gauja nia furné ite. Tlo iel da sotrissé che la “Garage Central” ne dà al mumënt nia plu ora abunamënc anuei ajache sun 222 plazes da parchejé a despusizion iel bele unit arjont la cumpëida de 116 abunamënc anuei, che ie l limit fat ora dala sozietà Park Urtijëi. Sce vel' un ne renuvea nia plu si abunamënt anuel pona unirà chësc dat inant a d'autri che ie nteressei. Per chël che reverda l muvimënt di auti te nosc luech à l Chemun bele aumentà i viages dl city bus y n jirà inant de chësc vieres. L travert ie de fé a na maniera che l vënie renunzià, l plu che la va, de adurvé l auto per se muever tl luech.
