Doi de majeri lëures per l ridl da Sacun
Grant ie stat l lëur che n à mplantà tl scumenciamënt dl’ansciuda 2023 tl ridl da Sacun. La Chemun de Urtijëi se ova tëut dant, davia che l fova scialdi de bujën, de pië su miec la funtana, de ngrandì l resservar che, per i bujëns d’al didancuei, fova deventà massa pitl y de mudé ora la roles dal’ega da bever dl egaduz da Sacun. Mudà ora an nce la iluminazion publica dala ustaria da Banch suvier, giamian ora la vedla lumes cun lumes a LED, n à metù ju na rola per l internet aslune, mudà ora i ëures de streda cun sasc nueves ulache n à pudù y per ultimo an mo metù ju da nuef l asfalt. Śën, do zirca n ann y mez de lëur, ie dut inò njenià ca a puntin y n possa dì che l gran custimënt de na milion de euro se à mpaià y ti garantirà ala jënt che sta sa Sacun de bona ega dla funtana de Lagustel per i proscimi dejeneies.
Jit a piz chësc lëur, possen bele pensé al segondo ntervënt, chël de cumedé y mëter n segurëza la steda per ruvé sa Sacun. Plu avisa se tratel dl proiet per cumedé la gran raida dan ruvé sa Sacun, che ie melciafieda defin, dà do dassënn y orainsom manacela de smuië ju. N cialerà de la tré plu ndrëta y de la fé manco priculëusa, cun n bel tretuar de 1,5 metri y na sief orainsom. Davia che sota streda ite iel de stlet material, fat de ghips y de mautes, y dessëura pert iel da crëp scialdi scherpënt, iel de bujën de n majer ntervënt. Aldò dl arat dl geologh saral perchël da mëter su, permez ala mont, n valguna rëies per schivé che l vënie ju material te streda. Orainsom ntant sce messeran mëter ju micropei, furan ju plu- tosc sot per ruvé tl bon crëp che tën permez, davia che, coche dit, tl sofonz iel de stlet material. Chësc porta nce pro che i custimënc per chësc lëur ie plutosc auc. Udù danora iel de spënder ades na milion y mesa per chësc tòch de streda de za. 200 metri. Ntan che l unirà laurà, iel udù dant che una na corsia dla streda resterà davierta per pudëi furné su y ju, dut adum cumandà da n semafer. Lumes de streda nueves y roles per l internet aslune ie sambën ënghe laite te chësc proiet. L proiet definitif ie njenià y n scrijerà ora i lëures śën d’autonn speran che n puderà scumencé limpea d’ansciuda dl 2025.
#BBD0E0 »