L cumité de curtina
Cie fej pa l cumité de curtina?
L cumité de curtina cëla sun la curtina y se cruzia di lëures che l ie da fé. L ie da dé ora la fòsses, rumé su, giavé fòsses, scudì la fòsses, de se cruzië dl magasin per la pacher y de duc i njinies che vën adurvei. L ie da cialé dla dlieja de Sant’Ana, de la giaurì y stlù, y da cumedé su sce mancia zeche. L ie unì tëut su dan passa 4 ani l laurant Alexander Verra che fej drët n bon lëur. Ël se cruzia de duc chisc lëures che l ie da fé y sëuraprò nce dla curtina sa Sacun.
Chi ie pa tl cumité de curtina?
A cë dl cumité de curtina ie l ambolt Tobia Moroder. L cumité efetif ie pona metù adum da doi reprejentanc dl Chemun, l assessëur Rodolfo Kostner y l cunselier Hermann Delucca, da seniëur digan Vijo Pitscheider, da Felix Mussner y da Anna Debon per la pluania. I cumëmbri cooptei zënza dërt de stima ie Eugen Verra y l reprejentant da Sacun Livio Malsiner. Matthias Hofer ie l scrivan y l cassier dl cumité de curtina.
Ti on fat n valguna dumandes a Alexander Verra.
Alexander, tu lëures bele passa cater ani te curtina, co te sal pa a fé chësc lëur? Ce lëures iel pa da fé?
Alexander Verra: Mi lëur me sà bel y son cuntënt de avëi chësc lëur. L ie uni di zeche d’auter da fé y for inò zeche de nuef. Cër lëures ie da fé uni di, coche per ejëmpl cialé do i cëires y i chibli y jì cun la maro- ca. D’inviern iel scialdi da palé y ngiaré, cialé che l ne sibe deguna dlaces ncantëur. D’instà iel dantaldut da sië, da cumedé fòsses sce per ejëmpl na crëusc se à stort o da mëter do tiera. Leprò vën i lëures che l ie da fé pra na supeltura. L cumité à fat ora de tò ora la plates che ie sun i troies te curtina per pudëi palé y sië plu saurì y nce per n miëur cialé ora.
Iel pa cosses da miuré tl’urganisazion dla curtina?
Duta la majera cosses vën fates ora tl cumité de curtina. Iló se ancuntons for inò. Sce l ie de pitli lëures da fé pona me audi cun l ambolt.
Co stala pa al didancuei cun l lascé brujé? Ce funzion à pa la curtina te chisc caji?
L ann passà ntan la pandemia univel scial- di brujà, i parënc di defonc fova nstësc n carantina y la ne fossa nia jita a tenì su l corp tan giut nchin che la carantina finëssa. Tlo da nëus iel da aspité 10 ani nchin che n possa mëter n vascel sun n auter che ie dessot. Sce la ne va nia autramënter pona vën l corp brujà. Nëus on n gran pert fòsses de familia y perchël pudons suplì normal. Ma l vën for tenì cont de coche i parënc uel: sce zachei ne uel nia unì brujà pona iel da tò na majera fòssa de familia o n’arcëda. Sce zachei vën brujà pona possen mëter te fossa l’urna nce dan che 10 ani ie passei.
Iel pa lerch assé te curtina y iela pa gran- da assé?
Per n valgun ani iel dessegur mo lerch assé, mé che on bele scumencià a rujené tl cumité de ngrandì la curtina per l daunì, sce l ie la puscibltà.