Sibe l puent dai auti che chël dala rodes y da jì a pe ie melciafiei y i unirà zarei ju. L unirà fat su un n puent nuef per duc.
L puent nuef sarà lerch 15 metri y l sarà doi cursies per i auti, una per la rodes y n tretuar per chëi che va a pe. Ora de chël lascen la puscibltà de fé povester n di o l auter n majer azes per camions per furné ora tl raion artejanel. Ntan i lëures uniral cialà che la streda ne vë nie tan che mei śareda, nsci che n ebe for la puscibltà de passé mpo. Sun l puent sota la streda passa nce truepa roles: chëla dla eghes blances y fosces, doves dl gas, una dla lectrisc, una dl telefon, una dl internet asvelt y chëla dl’iluminazion publica. La roles unirà ntegredes tl puent nuef, ora de chëla dl gas che unirà spusteda sota ruf ora. Sota l puent iel nce cabines dal gas, che ne unirà nia tuchedes ntan chisc lëures.
I lëures muessa unì fac da nuvëmber a auril canche l vën manco ega te ruf. De utober uniral scumencià a mëter ju micropali danter i doi puenc che ie śën. Iló fajeran la prima pert de puent cun la roles y ulache l possa nce bele passé auti. Chësc dëssa vester finà de dezëmber y ntan chisc prim mënsc possen passé sun l vedl puent. Da fauré inant puderan pona passé sun chësc tòch de puent nuef. L sarà una na cursia cun n semafer. Ntant uniral zarà ju l vedl puent y fat su da nuef la segonda pert dl puent nuef. Da dedò passerà i auti a mesa l puent ora, nsci che n possa ntant fé su i ëures dl puent, ulache l sarà l tretuar y la streda per la rodes. La firma BAUCON de Bulsan à laurà ora l proiet. I lëures unirà scric ora per ndut 1.230.265 euro, de chisc 900.571 euro per lëures da scri ora y 329.694 euro per somes a despusizion dl'aministrazion.