La sozietà Park Urtijëi à n cunsëi nuef
La sozietà Park Urtijëi G.m.b.H. à coche sëul cumëmber l Chemun de Urtijëi y l fin dla sozietà ie la gestion de trëi strutures. L se trata dla plaza dai auti "Parkgarage Central", dla strutura dal tennis che ie a Runcadic y dla plazes dai auti y dla curieres via n Setil. Do che tla ultima legislatura ova Laurin Moroder (presidënt), Irina Thaler y David Rifesser (cunselieres) aministrà drët bën la sozietà iel cun la veles nueves nce unì numinà n cunsëi nuef. L presidënt nuef ie Konrad Senoner y cunselieres ie unii numinei Claudia Insam y Ewald Moroder. L ie po’ nce unì spartì su i lëures: Konrad Senoner se cruzia dla garasc dai auti y dl personal, Ewald Moroder dl fabricat da jughé al tennis y Claudia Insam dla plaza dai auti y dala curieres via n Setil.
Per chël che reverda la Garage Central iel da dì che la ie dl Chemun y vën fiteda ala sozietà che muessa se cruzië dl personal, di lëures de manutenzion y de fé i nve- stimënc che va de bujën. I proscimi lëures, che sarà da fé tla garasc, ulache l à lerch 222 auti, y che ie unida frabicheda dan passa 20 ani, sarà chëi de mudé ora l mplant de iluminazion cun lumes a led y de fé da nuef la ijulazion dl plafon. Da dì iel mo che dan la pandemia se nuzova uni ann passa 60.000 auti de chësta garasc ulache i doi dependënc Thomas Demetz y David Rella se cruzia de dut chël che ie da fé. Per ti jì ancontra ala jënt dl luech iel unì fat ora che nchin a juni possen lascé l auto per 90 menuc zënza messëi paië. N spera nsci che la garasc vënie nuzeda nce da chëi da tlo.
L frabicat per jughé a tennis a Runcadic ie dla Park Urtijëi y ti vën fità ala Lia dal Tennis de Urtijëi, che se cruzia dla gestion. Danter l auter vëniel metù a jì turnoies de tennis a n bon livel y sambën dat la puscibltà de jughé a tennis y de tò ëures de scola cun n maester. Te chësta strutura à nce si sënta n local da fitness y n studio de fisioterapia. Leprò à la Grupa Arpizeda Sportiva Gherdëina jubas na palestra per pudëi fé si atività. Alalergia iel, ora dla plazes per jughé al tennis, mo na plaza ulache n possa jughé a volleyball. La Park Urtijëi à la respunsabltà dl fabricat y muessa cialé che dut sibe a norma per urganisé manifestazions sportives y cultureles, per ejëmpel l’UNIKA y turnoies de tennis, chësc respetan duta la regules de segurëza. Ultimamënter iel unì fat de plu miuramënc coche la porta de ntreda automatiseda y l ie unì mudà ora vieresc. I proscimi lëures da fé sarà l mudé ora l fonz pra la ntreda y dantaldut cumedé l tët.
La plaza dai auti via n Setil ie de puscion dla Lia per l turism y l Chemun à l dërt de spersa. D'instà se cruzia la Park Urtijëi dla gestion dla plazes da lascé i auti y la curieres. Ntan chisc mënsc iel la bela cumpëida de 6.800 auti y 320 curieres, che se nuzea de chësta plaza dai auti. D'inviern vën l areal fità via al Hockey Club Gherdëina, che deberieda al chemun de Urtijëi se cruzia de mëter a jì la plaza dala dlacia, ulache n possa jì cun i jadins y ulache i mutons possa jughé a hockey. Nce per chësta strutura se cruzia la Park Urtijëi dla manutenzion y di nvestimënc y proscimamënter saral da fé plu lëures, coche per ejëmpl miuré la ntreda, derturé la streda y curì i container cun breies.
Coche udù iel trëi strutures che pieta n bon servisc ala populazion de Urtijëi y ai turisć. L cunsëi nuef cialerà de les aministré cun lezitënza y de fé n bon lëur.