I lëures de ressanamënt dla scola mesana de Urtijëi ie n gran pert finei via
L ann passà d’instà oven scumencià cun i lëures per derturé su la scola mesana, n ova renuvà bëndebò a puntin l segondo y l terzo partimënt dla scola. Dantaldut Lara Moroder ova metù a jì chësta scumencia- diva y ova nvià via i lëures. Chëst ann iesen jic inant cun la segonda pert di lëures, der- turan su l basite y l prim partimënt. L ambolt Tobia Moroder y l’assessëura per la scoles Martina Comploi nes conta n pue’ coche i lëures ie jic y cie che l ie unì fat. L instà fova sambën inò drët curt per finé via i lëures, l fova de bujën de lauré debota per ressané defin i doi partimënc dla scola che manciova mo. Pernanche la scola fova fineda de juni oven scumencià a sfrië ora i fonc y riesc se oven ntendù che la plates dessot scassova y univa ca. Nsci fovel da zaré su duta la plates y da les mëter ju da nuef. Chësc ie stat scialdi n majer lëur de chël che n se ova aspità y perchël iesen nce ruvei ala strëntes cun i tëmps per finé via dut. A pèr cun chisc lëures per fé da nuef l fonz ti iesen sautei ite ai doi partimënc plu basc dla scola. Tlo iel unì baratà ora i fonc, la lumes, la portes y la mubilia te duta la tlasses y te duc i salamënc. N gran pëis ti an dat al’acustica che ie unida miureda cun n sussot acustich acioche i sculeies y i nse- nianc posse sibe tla tlasses che te porte o te d’autri posć lauré cun gheneda. Nce la gran scipa su per la scela sun la pert nord dla scola ie unida barateda ora per avëi dut ntëur plu linëus ti portesc. Ti portesc an nce metù ite n verdaroba nuef. Sëuraprò iel nce unì fat ite da nuef i banies che n pert fova mo scialdi vedli y melciafiei. Nce sce l ne ie nia stat saurì, iesen cun l aiut dla firmes stac boni de fé duc chisc lëures te zirca doi mënsc. Te porte pra la ntreda iesen mo tl lëur de mëter su n beamer cun na tëila per prejen- tazions, propi per vester boni de sfruté uni lerch dla cësa nce per de majera ancuntedes, p.ej. cun i genitores.
L’aministrazion de chemun ulëssa ti sentì gra ai proietanc, ala firmes y dantaldut nce ala diretëura Maria Kostner y a dut si team che ti ie stac do y à dat si contribut a tré tres chësta restruturazion. “L ie stat na bona cunlaurazion danter scola y chemun”, so- trissea Tobia Moroder y Martina Comploi, “na cunlaurazion dassënn positiva y produ- tiva che à purtà a n bon resultat.”
Śën iel mo de bujën de vel’pitl lëur dedite y nce de de majeri lëures dedora, coche p.ej. depënjer ju la cësa. L ie nce udù dant de fé na garasc sota tiera dan la porta de ntreda, acioche i sculeies ebe tl daunì na plaza per la pausa ulache i possa fé damat alalergia al segur. Per chël che reverda chisc lëures iesen tl lëur de dé su la ncëria per la proietazion.