La streda Pedetliva à mo na vedliscima rola dal’ega da bever che ie da baraté ora. Leprò vëniel ressolt n problem dl’ega ju per plaza.
La rola dal’ega da bever che ie da baraté ora muev sëura la butëiga dal pan tla streda Pedetliva, dala cësa SIP. Da iló vala via y ju y ora per la streda Pedetliva nchin dan l bar Haiti. Pona via per plaza Sant Antone nchin dan la Cassa dl Sparani. Chësta rola ie vedla y melciafieda y l ie gran ëura de la baraté ora. L vën nuzà l’ucajion de mëter ju tumbins nueves y dut cie che l toca leprò vëniel fat da nuef. Davia che la firma dl strom Edyna muessa tré tres plaza Sant Antone n cabl dal strom nuef, vëniel tl medemo mumënt nce metù ju chësta rola, che vën zënzauter paieda da ëi. Nsci iesen boni de schivé de messëi giavé su doi iedesc nosta majera plaza. Nce i idranc vën fac da nuef. De ndut ie la rola nueva longia 190 metri zirca. N tol nce l’ucajion de derturé su y fé plu blòta la plaza tla streda Pedetliva. Truepa jënt passa iló, ajache l ie bën cin butëighes ntëur ite: la butëiga dala rodes, l beché, la butëiga dal pan, la butëiga dai ciofs y la ntreda dovia dl supermarchet. L unirà salejà y trat ndrët la plaza. Vel’ banch per se senté cun vel‘ lum leprò fajerà dainora na plaza da plajëi.
N problem da ressolver ie l’ega che vën ju per l raion da jì a pe canche l pluev. Truepa ega vën iló dan l bar Corso ju, raida a man drëta via y dan la butëiga dl Athesia vëniela aviseda a man drëta ju, direzion dla garage di Judacrëp y danter la cëses ora. Tlo mana- cel for inò de jì persëura y de mpifé dut cant. Perchël vëniel metù ju na rola che mëina duta chësta ega sota streda ora via te ruf. Duc chisc lëures durerà zirca 90 dis y costa de ndut 296.541 euro. Leprò vën la CVN (IVA) y d'autra spëises per de ndut 413.000 euro. L proiet ie unì laurà ora dal inj. Heinz Perathoner, l ie unì dat pro da dut l cunsëi de Chemun cun duc a una y unirà scrit ora proscimamënter d’ansciuda.