La sozietà Park Urtijëi à coche sëul cumëmber l Chemun de Urtijëi y l fin dla sozietà ie la gestion de trëi strutures.
L se trata dla plaza dai auti "Garage Central", dla strutura dal tennis che ie a Runcadic y dla plazes dai auti y dla curie- res via n Setil. L presidënt dl cunsëi ie Konrad Senoner y cunselieres ie Claudia Insam y Ewald Moroder. La Park Urtijëi à nce tl 2023 da mustré su na bilanz positiva. La soma dla ntredes ie stata de euro 371.625 che ie l 14% de plu che l ann dant. Sibe la "Garage Central" che la plaza dai auti "Setil" à abù n aumënt de auti y curieres che à parchejà (dessot la stati- stiches). De gra à chisc bon resultac puderà la Park Urtijëi dé si cuntribut fi- nanziel per l lëur de restruturazion che reverda l zënter dal tennis de Runcadic.
Gran pert di custimënc che sarà ntëur ai 900.000 euro messerà purempò unì metui a despusizion dal Chemun. Savon che la strutura ie unida frabicheda l ann 1987 y śën, do 37 ani iesen ublighei a la adaté ala normatives de segurëza che vën scrites dant al didancuei. Ma dantal- dut iel da fé da nuef l tët ajache l ie melciafià y ne tën nia plu l'ega.
Ora de chësc majer nvestimënt che unirà fat mo chëst ann iel unì fat l ann passà plu lëures tla "Garage Central". Danter l auter ie la garage unida sblanchejeda ora da nuef y per chël che reverda la segurëza iel mo unì metù su sëuraprò 7 videocameres. A chësta maniera iel śën 18 videocameres y nscila an sota cuntrol duta la garage.
N ie nce tl lëur de valuté prupostes per mudé la ntreda a na maniera che chëi che à n abunamënt anuel possa ruvé ite plu saurì nce sce l ie plu auti dan garage che aspieta che l vënie lerch. Savon che l ie dis ulache on na gran cumpëida de fulestieres y l ne ie perchël nia saurì giapé da parchejé. Purempò dijons mo n iede che per duc i zitadins iel a despusizion la "Happy Hour Card” (cëla dessot).
Sce de nuvëmber semiovel che la plaza dai auti "Setil" ulache d'inviern vëniel fat na plaza dala dlacia per furné cun i jadins ne pudëssa nia unì njenieda ca y chësc per gauja de na smueia che ova ruinà la roles che fova bele metudes ju per fé la dlacia; pona iel da dì che de gra al nteressamënt dl assessëur Janpiere Prugger y al gran mpëni di lauranc de chemun cun l aiut dl Hockey Club Gherdëina iela mpo unida a se l dé, ti fajan na gran legrëza a duc chëi che furnea gën cun i jadins.
Coche n vëija iel n gran mpëni da pert dl’aminastrazion dla Park Urtijëi per dé, cun l sustëni dl Chemun, n bon servisc a nosc zitadins y ai turisć.
La "Happy Hour Card” giapen paian na cauzion de 10 euro y n possa la ciarië cun la soma che n uel. Parchejan cun chësta cherta tla "Garage Central" ie la prima ëura y mesa debant. Uni ëura sëuraprò costa 1,80 euro.
