Sieves, sceles y roles a Urtijëi

Sieves, sceles y roles a Urtijëi

Do che n à fat da nuef la scela dla vedles sun plaza de dlieja y la scela che va dala streda Tresval ala streda Pedetliva, an nce lascià fé da nuef la scela che porta dal zënter su tla promenade dlongia la butëiga Conad. L lëur à fat l zumpradëur Stefan Canins y i petons che sustën la scela la firma da muradëur Simone Caterisano, che ulessan rengrazië. L ie unì mudà ora i trams sotite che fova frec y i scialieres che fova storc y scialdi melciafiei. N à sotite nce pià su l’ega de plueia, cumedan su la vedla rola che fova bele iló. La ne fajova nia plu si fat. Pra l troi che va inant sëura la scela à i lauranc de Chemun fat na bela sief, nsci che śën ie dut njenià ca a puntin.

For inò iel vel’ rola dal’ega da bever che streva y che ie da cuncé debota. N ie tl lëur de mudé ora 400 metri de roles dal’ega da bever tla streda Nevel y nce de finé via cun la proietazion di lëures dala streda Pedetliva nchin pra l cianton dla ustaria Haiti y inant nchin pra la Cassa dl Sparani. N auter cajo ie stat sota la ustaria Stua Catores. I lauranc de Chemun ti ie riesc sautei ite al problem y ie stac boni de l ressolver. Chësta rola, che mëina l’ega da bever dal resservar de Col de Flam nchin tla streda Grohmann, ie unida metuda ju bele tl 1938. Perchël saral zënzauter nce iló da se fé n pensier co y cie fé limpea tl daunì.