Dan n valgun ani ova l vardian dal’ega Christian Stuffer fat al savëi che la nfrastrutures tla streda Rumanon fova scialdi melciafiedes y bele plu suvënz oven messù sauté ite aslune pervia dla roles che stravova tlo y iló.
Nsci à la Jonta de chemun tëut tla man chësta situazion y n ti à dat la ncëria al studio EUT de Persenon per lauré ora n proiet per cumedé ca chësta streda, mu- dan ora la rola dal’ega da bever, la roles dal’eghes blances y fosces, che ne fova mo nia despartides te chësc ridl, y sambën nce la roles per na iluminazion nueva y la roles dal internet aslune.
Do che l proiet fova njenià y dat pro dal Cunsëi, an scrit ora i lëures per na soma de ades siesćëntmile euro, che ti ie jic ala firma Cogi de Leifers. Śën che dut ie finà via possen zënzauter dì che i à fat n bon lëur. Scumencià an d’ansciuda dl 2023, lauran tres per dut l instà, cun na paussa mé ti mënsc de lugio y agost, per finé via pona d’autonn ora.
L asfalt fin y vel’ pitl lëur ntëur ite an mo fat d’ansciuda dl 2024, ruvan śën a avëi na bela streda che possa se lascé udëi, cun lumes a LED che sparania strom y luna dantaldut mé ju sun streda, respetan nsci nce la mesures contra l mpaziamënt da linëus.
L ie stat n gran lëur che fova dessegur de bujën y che va dantaldut a bën dla populazion che viv te chël raion. Sambën à chëi che sta iló ntëur, ntan che l univa giavà y laurà, messù avëi pazienza, ma canche n fej de tei lëures ne vala danz no autramënter. Śën che duc i lëures ie stluc ju, ie l’aministrazion cumenela cuntënta che dut à butà y n spera zënzauter che n ebe gheneda per truep ani.