Damprovia ons prejentà i cunselieres dl Chemun de Urtijëi. Per finé via ulessans nce ti fé trëi dumandes al ambolt Tobia Moroder.
Cie Ve à pa dat la sburdla de candidé pra l’ultima veles?
Muesse dì che la dezijion de candidé n segondo iede da ambolt fova na cunse guënza de na esperienza drët positiva ntan la prima legislatura. Tl prim fovel sambën dut nuef, truep da mparé y suvënz fovel nce sfadiëus a ti sté do a dut, ma l me savova de vester ruvà ite bën tl lëur y savove che ti cater ani y mez ans anjenià ca truep de biei proiec che ulan mo purté a piz. Chël dl ambolt ie n bel lëur che dà de bela sudesfazions, nce sce l ne ie nia for saurì. L savëi de avëi nce na bela grupa dossù, cun persones che à de gran ideai, fova sambën ënghe de gran mpurtanza per tò chësta dezijion.
Śën sëis set ani l prim zitadin de Urtijëi. Co Ve sal pa, cie Ve sà pa l plu bel y cie manco bel de Vosc lëur?
Coche dit, l ie n lëur che dà truepa sudesfazions. N chemun se cruzia de truepiscima cosses y la gran pert di proiec y dla scumenciadives va nce a bon fin, y canche dut garata ie nce la legrëza aldò. N ruva nce n cuntat cun scialdi persones y cun truep argumënc desfrënc, nsci ne devëntel mei da stufé y n mpera uni di zeche leprò, sibe prufesciunalmënter che nce umanamënter. Sambën, datrai ne butela nia coche n se l nmagina y suvënz tachela per una o l’autra rejon. La gran burocrazia che ie do feter uni proiet fej suvënz deventé lutri y n adrova na gran pazienza nchin che n ie boni de mëter n droa cër proiec.
Una dla cosses che me dà l plu da cë ie coche l ie unit a mancë, tla sozietà n generel, la respunsabltà de uniun nstës. L semea che n muessa mé plu abiné chëi che ie de gauja per zeche, medrë nia nstësc! Sce un ciumpëida te n pitl busc y sbriscia ora sun la dlacia, pona chier trueps la gauja tl chemun. L ruva for inò vel' lëtra de aucac y nia dinrer ti vëniel nce fat na plura al chemun. Nsci se sënten ciariei su de na respunsabltà, che do mi minonga ne dausëssa n ambolt o n chemun nia avëi. Chësta cuestion ie suvënz n rëm per l’aministrazion publica, ajache l ne basta nia plu l fundamënt per tò cërta dezijions.
Ciuni ie pa al mumënt i proiec plu mpurtanc a chëi che l vën laurà y che ie per Vo na priorità?
N proiet scialdi mpurtant ie chël che vëija dant l renuvamënt dl’egaduz sa Sacun, che unirà sën scrit ora y che ulessan scumen cé d’ansciuda, n proiet da passa na milion de euro, per garantì l’ega da bever al ridl da Sacun y nce ega assé tl cajo de n meldefuech. Da bestia mpurtant per Urtijëi ie do mi minonga l cunliamënt danter la streda Rezia y la Tresval dal Fever, ulache spere de pudëi tosc stlù ju l cuntrat cun i patrons di grunc. Cun chësc proiet unissel tëut ora truep auti tl tòch de streda danter Ladinia y Scudela y chësc purtëssa pro che n pudëssa dassënn abelì chësc raion ula che l ie truepa butëighes y ustaries.
Danter i proiec che me sta l plu a cuer iel sambën la Cësa di Ladins, ulache la va śën deberieda cun la Provinzia de seguré i finanziamënc. Ie spere che pudon tosc jì inant y ti dé la ncëria al Arch. Rudi Perathoner y si team per lauré ora l proiet sun la basa de si pruposta scialdi garateda che ova venciù l cuncors de proietazion. Per Urtijëi ie do mi ntënder for mo l proiet plu mpurtant chël che vëija dant de tò ora la curieres y i auti da Plaza Sant Antone y de spusté ora la curieres sun la Tresval. Purtruep ne fova la tratatives per ruvé a una cun i patrons di grunc nia jites a bon fin y perchël sarà chësta na cuestion mo plutosc longia, nce sce la maiuranza ie a una de jì inant sun chësta streda.