Tobia Moroder - sindaco
43 anni, sindaco in carica
D’autonn dl 2015, deberieda cun la Lista Unica, ovi sentì de messei sëurantò respunsabltà per nosc luech, do che la veles de mei de ch’l ann fova jites ala nia, lascian nsci Urtijëi per mez ann zënza ambolt.
Ntant ie passeda truepa ega sota i puenc ora. Per mé y mo n valgun cunselieres de nostra grupa iel ntant bele la segonda o la terza veles de chemun; per i autri iel l prim iede che i se mët sun lista. Nsci à la Lista Unica nce chësc terzo iede ndolauter abinà adum na lista plëina, desmustran che nce te tëmps ulache la jënt se destaca dala politica iesen boni de descedé l nteres y la ueia de se dé ca per l bën de nosc luech y de duc nëus. Pudon nsci inò se prejenté cun na lista plëina, ndut 27 candidates y candidac - doi de chisc che mët su cun l simbol di Vërc - che à ueia de se paré ite la manies per nosc luech. Propi te chësta enes che se anjenion ca per la veles me fejel plajëi a udëi ce sinergia y ce bela dinamica che vën a se l dé canche esperienza y ideies nueves se anconta, canche n pënsa al daunì de Urtijëi.
Te chisc ultimi 5 ani ons realisà truep proiec, per spëises de nvestimënt de ndut passa 35 milions de euro. Cun n cër stolz possi nce cunedì che i majeri proiec, sun chëi che on laurà ti ultimi ani, à ntant na fundamënta sterscia y puderon i tré tres ti proscimi 5 ani:
- la streda de cunliamënt tal Fever vën iust proieteda tl detail
- per la Cësa di Ladins ons abinà i finanziamënc y pudon tosc muever cun la proietazion
- n cont dla Cësa de Paussa y dl Servisc soziel ons stlut ju cun i autri chemuns dla valeda l’acurdanza per l ressanamënt y l ngrandimënt, nsci che pudon scrì ora la proietazion
- i raions per l frabiché alesirà „Sobosch“ y „Pizer“ ie anjeniei: d’instà via giaurions la graduatories y ca. 15 families puderà se frabiché si prima cësa
- de plu proiec de infrastrutures y stredes ie anjeniei per pudëi i scrì ora, coche p.ej. l slargiamënt dla streda Cuca o la nfrastrutures tla streda Cademia, o nce l renuvamënt dla roles dal'ega danter la funtanes de Cunfin y la Popa, proiec che unirà a se l dé ti proscimi 2-3 ani.
Ma l Chemun ne ie sambën nia mé strutures y infrastrutures, l chemun ie scialdi deplù, l ie nce cumenanza, l ie servijes per la jënt, l ie persones che se anconta. L chemun sons nëus duc cun nosc bujëns y nosc cruzi da uni di. Iust tl ciamp dl soziel, dla cultura y dla lies n generel à la Lista Unica for desmustrà na sensibilità particulera, ti dajan for nce n gran pëis nia mé al "cie", ma nce al "co".
Propi ajache son segur che chisc proiec jirà ndroa y che chësta maniera de fé politica sibe la drëta, speri de pudëi mo n iede fé cont cun Vosta crëta. Sce jëis tres la lista de nosc candidac, pona Ve renderëis cont che Vosta crëta ie te de bona mans!