L architet Rudi Perathoner de Sëlva à venciù deberieda cun i architec Andreas Lengfeld y Pavol Mikolajcak l cuncorsà venciù l cuncors de proietazion per la Cësa di Ladins. L ambolt Tobia Moroder nes conta coche cumëmber dla giuria de coche la ie jita tla
Ai 13 de mei dl ann passà iel unì publicà sun la plata internet dla Provinzia l comu- nicat dl cuncors de proietazion a livel eu- ropeich per la Cësa di Ladins nueva. N pudova fé dumanda de tò pert al cuncors nchin ai 13 de lugio dl 2020. La preselezion à nsci scumencià y ai 24 de agost iel unì cunedì i inuemes di 14 architec che pudova fé pea pra la segonda fasa de cuncors. Nchin ai 21 de dezëmber messova chisc proiec unì mandei ite y 13 de chisc 14 à dat ju, te forma anunima, n proiet preliminer. Ai 19 de merz se à pona ancuntà la giuria tla gran sala dla Cësa de cultura tenian ite duta la regules scrites dant pervia dl coronavirus. L architet Josef March fova l presidënt dla giuria, i autri cumëmbri fova l ambolt Tobia Moroder, mag.a MAS Stefania Pitscheider-Soraperra, arch. Gerlinde Prugg (sostituta de arch. Bernardo Bader) y arch. Reinhard Madritsch. I proiec ie unic cunscidrei ju avisa, dantaldut sun la basa dl “plan per la partizion dla lerch” (“Raumprogramm”), metù adum ti ani 2018 y 2019, che spiega avisa coche la lerch unirà spartida su danter la lies y ce locai che uni lia adrova. L ie unì cialà sce i proiec respetea la sperses damandedes da uni lia. Ora de chël ova l pruf. Erich Sidoroff dl “Institut für Gestaltung” dla Università de Dispruch bele danora svilupà n cunzet generel de funziunamënt dla Cësa di Ladins tl daunì, cunscidran i bujëns dla lies y cialan nce de lauré sun la sinergies danter chëstes. De plu architec se à sten- tà a tenì ite dut chësc, ma feter i mec ie stac drët boni de ressolver do la rata bën duta la problematiches.
L ie da tenì cont che la pert plu mpurtanta n cont de lerch y na ndesfideda nia pitla per la proietazion ie zënzauter duta la pert dl Museum che à bujëns particuleres, ajache l muessa danter l auter nce unì garantì la cunservazion y l mantenimënt dla culezions, nosta gran arpejon culturela. Nce n cont dla sala multifunziunela, per l teater y d’autra manifestazions, cun 200 posć, iel da tenì ite truepa regules, per ejëmpl muessela avëi na cërta autëza y n.i. Leprò vën nce duta la pert aministrativa cun i ufizies per l Museum, per la Union di Ladins, per la Union Generela di Ladins dla Dolomites cun i ufizies dla Usc di Ladins y sambën nce la Bibliotech ladina che dëssa avëi na funzion zentrela tla Cësa.
Ala fin fovel mo restei trëi proiec che ova la sperses urganisedes propi bën y na pruposta architetonica nteressanta. Savan che chësc ie mé n proiet preliminer fovel nce da cunscidré tan de putenziel de miuramënt y otimisazion che ie pra n proiet, y nsci iesen po’ ruvei a crì ora l proiet che à ala fin venciù.
Nsci fova la tlassifica sun mëisa y l ie unì giaurì la bustes cun i inuemes di architec, damprovia, scumencian dal ultimo. Canche mé plu una fova stluta savoven che l manciova mé plu l inuem dl arch. Rudi Perathoner. L ie scialdi bel che l à venciù n architet de Gherdëina, che povester à nce sentì la mpurtanza de chësta cësa, lauran ora nsci n proiet scialdi pensà tres y garatà che possa dé prestige a duta la cultura ladina.