L Chemun de Urtijëi nvieia a na sëira de nfurmazion n cont dl Program de svilup cumenel, n mierculdi ai 29 de nuvëmber dala 20.00 tla Cësa de Cultura.
Co iel pa a viver a Urtijëi, cie se mbincia pa la jënt, co dëssa pa se svilupé l luech? A chësta dumandes y a trueps d'autres pur- verà l Chemun de Urtijëi a ti dé na resposta tres l "Program de svilup cumenel", che n à scumencià a lauré ora dan n mez ann. Coche n vëija la situazion atuela y cie che n se mbincia per l daunì de Urtijëi, chël ti à l Chemun nce damandà a duc i zitadins y duta la zitadines n ucajion de na nrescida che n à fat chëst ann d’instà . Ai 29 de nuvëmber dala 8 da sëira te Cësa de Cultura uniral prejentà i resultac dla nrescida, ma nia mé. L unirà nce purtà dant da pert di esperc nciariei chël che l ie unì fat ntan la prima ancuntedes dla grupa de lëur, che à la ncëria da pert dl Chemun de lauré ora n documënt strategich che dëssa mustré su la streda per n svilup san dl luech.
La grupa, metuda adum da ades trënta persones, à te si prima ancuntedes analisà dantaldut la situazion atuela tl Chemun de Urtijëi. N ti à cialà a coche la ie per cie che reverda i cuatieres y la mubiltà , coche ie la situazion n cont dl lëur, dl turism, dl ambient y de dut chël che à da nfé cun la vita te nosc luech.
Do che n arà stlut ju chësta prima pert dl Program de svilup scumenceran pona l ann che vën a lauré sun la pert strategica dl Program de svilup.
Duc ie de cuer nviei a tò pert a chësta sëira de nfurmazion.