Senteda dl Cunsëi de Chemun di 12.10.2021

Fé pea ala iniziativa audit "Family Plus - Familie leben"

Nicole Pozzi dl "forum de prevenzion" porta dant l proiet y respuend ala du- mandes di cunselieres. Urtijëi ie danter i prim 7 chemuns de Südtirol che tol pert a chësc audit. Cun chësta scumenciadiva possa l chemun ti dé vijibltà a si politica per i mutons, i jëuni, i seniores y la fami- lies n generel, ma dantaldut nce capì mo miec, te ciun ciamps che n possa mo miuré i servijes per la families. Duc i cunselieres ie a una de fé pea pra chësc proiet.

Nterogazion dla grupa dl cunsëi SVP per rumé su l bosch de Resciesa

La nterogazion dla SVP y la resposta da pert dla coalizion vën lietes dant. “Ti ulimi ani iel cun la gran neveres tumà truep lëns tl bosch de Resciesa, les à gaujà n gran dann. Tl bosch de Resciesa ne ruven nia saurì permez te cër raions y la stredes furesteles ie melciafiedes. L ie de bujën de vester boni de pudëi tò y tres i lëns sturcei y taiei, nce per schivé che parassic se sparpanieia ora. Co uelen pa rumé su i danns y iel pa udù dant de fé stredes nueves?“, nsci la dumandes dla SVP. La maiuranza respuend: “L se trata de n avenimënt ora dl normal, l ie dessegur na gran desfideda y l ie rie a dì avisa tan de lëns che ie tumei, ajache i ie tumei n pue' sëura dut l bosch de Resciesa. L ie unì rumà su da pert de chemun 600 metri cubich y 280 metri cubich ie lënia per tizé per i zitadins. Ti proscimi mënsc y ani unirà i lëures purtei inant nciarian firmes spezialisedes. L ne ie per ntant nia udù dant de fé stredes nueves.”

Mozion dla grupa dl cunsëi SVP per fé n troi/trail per la rodes sun l purtoi dai schi da Resciesa ju

L ambolt spiega che n à bele fat n valguna ancuntedes dal 2018 incà n chësc cont cun de plu categories che fossa ntere- ssedes a n troi dla rodes da Resciesa ju. L ie for plu y plu persones che va cun la roda, sibe turisć che nce jënt da tlo. N troi o n trail, coche l vën dit, à vantajes y svantajes. Dessegur iel de bujën de abiné na regulamentazion per i troies y de spartì chëi che va a pe da chëi che va cun la roda. Plu cunselieres tol posizion y auza ora i aspec desfrënc de n tel proiet. La minonghes di cunselieres possen scuté su sun la plata internet dl Chemun. La mozion vën lieta dant y la maiuranza ie a una. Un n cunselier dla Lista Unica se astën.

Prejentazion dla candidatura de Gherdëina per i campionac dl mond de schi 2029 y mozion de prëscia dla SVP

Rainer Senoner, presidënt dl Saslong Classic Club, spiega drët a puntin dut chël che reverda la candidatura de Gherdëina. Truep cunselieres tol la parola y dij si minonga, che n possa scuté su sun la plata internet dl Chemun. La candidatura definitiva muessa unì data ju ala FIS d’ansciuda dl 2023, te n ann y mez. La grupa dl’ SVP ulëssa savëi, tres na mozion de prëscia, ciuna che ie la posizion dl Chemun de Urtijëi per pudëi dé reposta ai autri Chemuns y ai zitadins: iesen pa per o contra i campionac dl mond te Gherdëina? La cunseliera Sara Stuflesser liej dant la tëuta de posizion dla grupa “Lista Unica” y nce l cunselier Stefan Kasslatter liej dant na si tëuta de posizion. Tramedoves possen liejer sun la plata internet dl Chemun. La Lista Unica porta dant che al mumënt ne iel mo nia puscibl dì de sci o de no, ajache n ne sà mo nia cuncretamënter te ciuna direzion che jirà i proiec. N muessa śën duc deberieda lauré ora n cunzet plu cuncret di campionac dl mond y tré ite tla discuscion plu esperc de uni ciamp, dantaldut n cont dla mubiltà, ma nce la lies y la jënt. N sotrissea che n ie a una de lauré pea cun l'autra aministrazions de Gherdëina per mëter mpe n proiet che posse vëiramënter purté pro a n svilup sustenibl. Stefan Kasslatter dij che l fossa a una sce n giaperà garanzies per na zircunvalazion per ressol- ver l problem dl trafich y che nce l Sci Club Gherdëina unissa a vel' maniera trat ite dassënn. L espunënt dla Lega Salvini y i cunselieres dla Lista Unica à dat ju n'astenscion, ora de un n cunselier che fova de contra. I cunselieres dla SVP à lità de SCI.

Proiet de mascima per cumedé su la sala polifunziela tl partimënt basite tla Cësa de Cultura “Luis Trenker”

L proiet vën purtà dant y dut l cunsëi ie a una. Per de plu nfurmazions cëla articul a pert.

Regulamënt per l refudam organich

Da śën inant à nce i fitamajons, garnì, residence y chëi che fej atività turistica la puscibltà de pudëi dé ju refudam organich. I priejes vën calculei aldò di metri cuadrat che ie scric ite tl cataster. Dut l cunsëi ie a una de dé pro l regulamënt nuef.